नवी मुंबई आंतरराष्ट्रीय विमानतळास लोकनेते स्व. दि. बा. पाटील साहेब यांचे नाव देण्यात यावे, या न्याय्य आणि जनभावनांशी निगडित मागणीसाठी समाजसेविका रश्मीता पोपेटा यांनी सुरू केलेल्या आमरण उपोषण आंदोलनास ‘धर्मराज्य पक्षा’तर्फे जाहीर पाठिंबा देण्यात आला.
यावेळी ‘धर्मराज्य पक्षा’चे सचिव नरेंद्र पंडित यांनी पक्षाचे समर्थनपत्र आंदोलनस्थळी सुपूर्द केले. तसेच ‘धर्मराज्य पक्षा’चे प्रवक्ते समीर चव्हाण, कामोठे येथील धर्मराज्य पक्षाचे पदाधिकारी महेंद्र म्हात्रे, विजय म्हात्रे, बाबुराव भगत व इतर कार्यकर्त्यांनी उपस्थित राहून आंदोलनास नैतिक व वैचारिक पाठिंबा व्यक्त केला.
‘धर्मराज्य पक्षा’ची सुरुवातीपासूनच ठाम भूमिका आहे की, नवी मुंबई आंतरराष्ट्रीय विमानतळास लोकनेते स्व. दि. बा. पाटील यांचेच नाव देण्यात यावे. हा केवळ नामकरणाचा विषय नसून भूमिपुत्रांच्या संघर्ष, त्याग आणि अस्मितेचा सन्मान आहे.
शासनाने जनभावनांचा आदर राखून ही न्याय्य मागणी तात्काळ मान्य करावी, अशी ‘धर्मराज्य पक्षा’ची आग्रही मागणी आहे.