ठाणे महानगरपालिकेच्या प्रस्तावित मालमत्ता कर व मालमत्ता हस्तांतरण शुल्कवाढीविरोधात तसेच सन २०२४-२५ व २०२५-२६ चे लेखापरीक्षण अहवाल जाहीर करावेत, थकीत महसुलाची प्रभावी व कालबद्ध वसुली करावी, विकास आराखड्यातील वाहनतळासाठी सुविधा भूखंडांचा वापर करून नियोजनबद्ध वाहनतळ निर्माण करावेत आणि रस्त्यावरील धोकादायक पार्किंगसंदर्भातील ठराव रद्द करावा, या मागण्यांसाठी ‘धर्मराज्य पक्षातर्फे’ सोमवार, दि. १७ ऑगस्ट रोजी ठाणे महानगरपालिकेच्या महासभेच्या दिवशी परमार्थ निकेतनजवळ शांततामय आंदोलन करण्यात आले.
महानगरपालिकेने सन २०२६-२७ चा अर्थसंकल्प सादर करताना करवाढ न करता GIS तंत्रज्ञानाद्वारे मालमत्ता शोधून महसूल वाढविण्याची भूमिका मांडली होती. मात्र, त्यानंतर मालमत्ता करासह हस्तांतरण शुल्कवाढीचा प्रस्ताव पुढे आल्याने आधी थकीत महसूल वसूल करा, महसूल गळती रोखा आणि त्यानंतरच करवाढीचा विचार करा, अशी भूमिका आंदोलनकर्त्यांनी मांडली. “करवाढ नको, न्याय हवा! आर्थिक बोजा नको, पारदर्शक कारभार हवा! टॅक्स आमचा, पैसा आमचा! हिशोबही आम्हालाच हवा!” अशा घोषणांनी परिसर दणाणून गेला.
यावेळी सन २०२४-२५ व २०२५-२६ चे लेखापरीक्षण अहवाल तातडीने जाहीर करून अधिकृत संकेतस्थळावर उपलब्ध करावेत, तसेच महसूल थकबाकीची अद्ययावत, अधिकृत व विभागनिहाय आकडेवारी जाहीर करावी, अशी मागणी करण्यात आली. “थकबाकी वसूल करण्याची हिंमत दाखवा; करवाढीचा सोपा मार्ग सोडा!” असा इशाराही देण्यात आला.ठाणे शहरातील वाढती वाहनसंख्या आणि अपुऱ्या पार्किंग सुविधांमुळे निर्माण होणारी वाहतूक कोंडी व नागरिकांच्या सुरक्षिततेचा प्रश्न लक्षात घेता, विकास आराखड्यातील वाहनतळासाठी आरक्षित/निर्धारित सुविधा भूखंडांवर बहुमजली व नियोजनबद्ध वाहनतळ उभारावेत आणि रस्त्यावरील धोकादायक पार्किंगला प्रोत्साहन देणारा ठराव रद्द करावा, अशी मागणी करण्यात आली.
‘ठाणे क्लस्टर विकास कंपनी’च्या प्रस्तावावर सवाल
किसन नगर परिसरातील क्लस्टर-प्रकल्पाच्या कामकाजाच्या पार्श्वभूमीवर ‘ठामपा’च्या नियंत्रणाखाली ‘ठाणे क्लस्टर विकास कंपनी’ स्थापन करून त्यासाठी महासभेची मंजुरी घेण्याच्या घाईमागे नेमके कोणाचे हित आहे?, असा सवाल धर्मराज्य पक्षाने उपस्थित केला.ठाणे शहरात पाणी, वीज, मलनि:स्सारण, अग्निसुरक्षा, आरोग्य, शिक्षण, स्वच्छता, सार्वजनिक वाहतूक व पार्किंग यांसारख्या मूलभूत सुविधांची कमतरता असताना, वाढत्या बांधकामामुळे शहरावर आणखी भार टाकण्यापूर्वी या कंपनीच्या माध्यमातून एकूण किती चटईक्षेत्राचे क्लस्टर प्रकल्प हाती घेण्यात येणार आहेत, त्यासाठी किती चटई निर्देशांक देण्यात येणार आहे आणि एवढा चटई निर्देशांक शहराच्या सध्याच्या पायाभूत सुविधांना झेपणारा आहे का, याचा संपूर्ण व पारदर्शक खुलासा करावा, अशी मागणी करण्यात आली.
“महापालिका कोणाची? जनतेची की कंपन्यांची? क्लस्टरच्या नावाखाली कंपनी कोणासाठी? ठाणेकरांसाठी की बिल्डरांसाठी?” असा सवाल करत, कोणत्याही मोठ्या विकास प्रकल्पापूर्वी शहराची वहनक्षमता, पायाभूत सुविधांची क्षमता आणि भविष्यातील परिणामांचा शास्त्रशुद्ध अभ्यास सार्वजनिक करावा, अशी मागणी करण्यात आली.आंदोलनादरम्यान ठाणे महानगरपालिका आयुक्त मा. सौरभ राव यांना धर्मराज्य पक्षाच्या वतीने मागण्यांचे निवेदन सादर करून तातडीने कार्यवाहीची मागणी करण्यात आली. प्रशासनाने या मागण्यांवर सकारात्मक निर्णय न घेतल्यास ठाणेकर नागरिकांच्या हितासाठी यापुढेही अधिक तीव्र लोकशाही मार्गाने आंदोलन करण्यात येईल, असा इशारा धर्मराज्य पक्षाने दिला.
यावेळी धर्मराज्य पक्षाचे अध्यक्ष मा. राजन राजे यांच्यासह, काँग्रेस पक्षाचे ठाणे जिल्हाअध्यक्ष राहुल पिंगळे, सचिव महेंद्र म्हात्रे, संभाजी ब्रिगेडचे श्री. चंद्रशेखर पवार, जन आंदोलनांचा राष्ट्रीय समन्वयचे श्री. संजय मं.गो., ठाणे मतदाता जागरण अभियानचे उन्मेष बागवे व राजेंद्र चव्हाण (भारत जोडो अभियान), आम आदमी पक्षाचे ठाण्यातील पदाधिकारी, तसेच धर्मराज्य पक्षाचे सचिव नरेंद्र पंडित, प्रवक्ता समीर चव्हाण, ठाणे लोकसभा उपाध्यक्ष सचिन शेट्टी, धर्मराज्य कामगार कर्मचारी महासंघाचे खजिनदार अजित सावंत, जगन्नाथ सल्लागार, हनुमंत किणी, शरद भोईर आदी पदाधिकारी व कार्यकर्ते तसेच ठाणे रिक्षा संघटनेचे सुशीलकुमार चंद्रा, रवी मिश्रा, महासंघाचे कामगार सदस्य तुषार बर्डे व अन्य कामगार सदस्य आणि ठाणेकर नागरिक सहभागी झाले होते.
भारताच्या ८०व्या स्वातंत्र्यदिनानिमित्त, ठाणे जिल्हा शिवसेनेच्या वतीने शहरातील चंदनवाडी शिवसेना शाखेत १४ ऑगस्टच्या मध्यरात्री स्वातंत्र्यदिनाचा सोहळा मोठ्या दिमाखात आणि उत्साहपूर्ण वातावरणात साजरा करण्यात आला.
महाराष्ट्र अंधश्रद्धा निर्मूलन समितीच्या ३७व्या वर्धापन दिनानिमित्त महा. अंनिस – ठाणे शहर शाखेच्या वतीने रविवार, दि. ०९ ऑगस्ट २०२६ रोजी सायंकाळी ५.३० वाजता आयोजित विशेष कार्यक्रमास धर्मराज्य पक्षाचे अध्यक्ष मा. राजन राजे तसेच ज्येष्ठ पत्रकार व माजी खासदार कुमार केतकर प्रमुख वक्ते म्हणून उपस्थित होते.
मा. राजन राजे यांच्या भाषणातील महत्त्वपूर्ण विचार —
माझी तशी त्यांच्याशी ओळख अलिकडचीच…साधारण वर्षभरापूर्वी निवर्तलेले, कामगार-चळवळीचे आधारस्तंभ, काॅ. संजय संघवींचे, यांचे ते जिगरी दोस्त…हे ही आम्हाला अलीकडेच समजलेलं! बायबलमध्ये म्हटलंय… “By their fruit you will recognize them…Do people pick grapes from thornbushes, or figs from thistles?” अगदी तसंच, “त्यांच्या कृती आणि त्यांच्या अस्तित्वाचे भवतीच्या समाजावर झालेले परिणाम” पाहिल्यानंतर…अगदी थोडक्या परिचयात, मी त्यांच्या एकूण व्यक्तित्वाचा धांडोळा घेऊ शकलो, ते माझ्यासाठी, एकूणच समाजासाठी व कामगार-चळवळीसाठी खूपच महत्त्वाचं आहे.
वाशेरे (भिवंडी) येथील मेसर्स सिम्प्रेस इंडिया प्रा. लि. या डिजिटल प्रिंटिंग क्षेत्रातील कंपनीत, अत्यंत प्रतिकूल आर्थिक परिस्थितीतही धर्मराज्य पक्षप्रणित धर्मराज्य कामगार-कर्मचारी महासंघातर्फे कामगारांच्या पगारवाढीचा करार यशस्वीरीत्या संपन्न झाला आहे. ज्येष्ठ कामगार नेते मा. राजन राजे यांच्या नेतृत्वाखाली झालेल्या या करारानुसार, कंपनीतील ३५ कायम कामगारांना सरासरी रु. १२,९५८ (सुमारे रु. १३,०००) थेट पगारवाढ मिळणार आहे.
याशिवाय, कामगारांना दरवर्षी ६ अतिरिक्त सशुल्क सुट्ट्या, दरवर्षी ३ गणवेश, तसेच कामगार व त्यांच्या पालकांचा मेडिक्लेम प्रीमियम कंपनीतर्फे भरण्याची महत्त्वाची तरतूद करण्यात आली आहे. तसेच, येत्या काही महिन्यांत ५ ते ६ कंत्राटी कामगारांना कायम सेवेत सामावून घेण्याचा निर्णय घेण्यात आला असून, भविष्यात कायम होणारे व संघटनेचे सभासद बनणारे कामगारही या करारातील सर्व लाभांसाठी पात्र असतील.
मे. अंशुल इनोव्हेटिव्ह केमिस्ट्री प्रा. लि. येथील कामगारांच्या बेमुदत संपाला १०० दिवस पूर्ण झाल्यानिमित्त, धर्मराज्य पक्ष प्रणित धर्मराज्य कामगार-कर्मचारी महासंघाशी संलग्न एलजी हिंग, मुंबई व प्रोटेगो, नवी मुंबई येथील कामगार सदस्यांनी संपकरी कामगारांना एलजी हिंग, मुंबई व प्रोटेगो, नवी मुंबई युनिटकडून प्रत्येकी रु. २५,०००/- चा धनादेश प्रदान करून आर्थिक मदत केली. या प्रसंगी न्याय्य हक्कांसाठी सुरू असलेल्या संपाला संघटित कामगार चळवळीचा ठाम पाठिंबा व्यक्त करण्यात आला. तसेच, कामगारांच्या प्रलंबित मागण्यांबाबत व्यवस्थापनाने सकारात्मक भूमिका घेऊन लवकरात लवकर समाधानकारक तोडगा काढावा, अशी अपेक्षा व्यक्त करण्यात आली. या आर्थिक मदतीमुळे संपकरी कामगारांना संघर्ष पुढे नेण्यासाठी बळ मिळाले असून, विविध उद्योगांतील कामगारांनी दाखविलेल्या ऐक्यभावनेचे हे उल्लेखनीय उदाहरण ठरले.
आज धर्मराज्य पक्षासह शिवसेना (उद्धव बाळासाहेब ठाकरे), तसेच विविध सामाजिक, कामगार, विद्यार्थी व राजकीय संघटनांच्या संयुक्त वतीने ठाणे जिल्हाधिकारी यांच्यामार्फत केंद्र सरकारला निवेदन सादर करण्यात आले.
यावेळी धर्मराज्य पक्षाचे अध्यक्ष श्री. राजन राजे म्हणाले, “लोकशाहीत जनतेच्या प्रश्नांना उत्तर देण्याचा मार्ग दडपशाही नव्हे, तर संवाद आहे. विद्यार्थ्यांच्या भविष्याशी संबंधित प्रश्न असो किंवा पर्यावरण संरक्षणाचा विषय असो, केंद्र सरकारने आंदोलनकर्त्यांशी तात्काळ चर्चा करून त्यांच्या न्याय्य मागण्यांवर सकारात्मक निर्णय घ्यावा. विद्यार्थ्यांचे भविष्य सुरक्षित ठेवणे आणि देशाच्या पर्यावरणाचे संरक्षण करणे ही सरकारची संविधानिक जबाबदारी आहे.”
