मे. अंशुल इनोव्हेटिव्ह केमिस्ट्री प्रा. लि. येथील कामगार गेल्या तीन महिन्यांपासून आपल्या न्याय्य व प्रलंबित मागण्यांसाठी बेमुदत संपावर आहेत. आपल्या हक्कांसाठी सुरू असलेल्या या संघर्षाला आता विविध उद्योगांतील कष्टकरी कामगारांकडूनही भक्कम पाठिंबा मिळत आहे.
धर्मराज्य पक्ष प्रणित धर्मराज्य कामगार-कर्मचारी महासंघाशी संलग्न रायगड, तळोजा येथील जॉन्सन मॅथे कंपनीतील कामगार सदस्यांनी अंशुल इनोव्हेटिव्ह केमिस्ट्रीच्या संपकरी कामगारांची भेट घेऊन त्यांच्या संघर्षाप्रती एकजूट व्यक्त केली. यावेळी संपकरी कामगारांना रु. २२,५००/- चा धनादेश प्रदान करून आर्थिक मदतीचा हात पुढे करण्यात आला.
विशेष म्हणजे, जॉन्सन मॅथे कंपनीतील कामगारांनीदेखील चार वर्षांपूर्वी आपल्या न्याय्य व प्रलंबित मागण्यांसाठी बेमुदत संप पुकारला होता. या संघर्षानंतर व्यवस्थापनासोबत झालेल्या चर्चेतून एक त्रैवार्षिक वेतन करारदेखील संपन्न झाला. त्यामुळे अंशुल इनोव्हेटिव्ह केमिस्ट्रीच्या कामगारांच्या सध्याच्या संघर्षातील वेदना आणि त्यांची लढ्याची गरज जॉन्सन मॅथेतील कामगारांनीही जवळून अनुभवलेली आहे.
ही मदत केवळ आर्थिक स्वरूपाची नसून, “एक उद्योगातील कामगारांच्या न्याय्य लढ्याच्या पाठीशी दुसऱ्या उद्योगातील कामगार ठामपणे उभे आहेत,” या संघटित कामगार चळवळीच्या ऐक्याची आणि बंधुभावाची जिवंत प्रचिती आहे.
कामगारांच्या न्याय्य हक्कांसाठी सुरू असलेल्या या संघर्षाला धर्मराज्य कामगार-कर्मचारी महासंघाचा ठाम आणि सक्रिय पाठिंबा आहे. कामगारांच्या प्रलंबित मागण्यांबाबत व्यवस्थापनाने सकारात्मक भूमिका घेऊन चर्चेच्या माध्यमातून लवकरात लवकर समाधानकारक तोडगा काढावा, अशी अपेक्षाही यावेळी व्यक्त करण्यात आली.
या आर्थिक मदतीमुळे संपकरी कामगारांना आपला संघर्ष पुढे नेण्यासाठी निश्चितच बळ मिळाले आहे. विविध उद्योगांतील कामगारांनी एकमेकांच्या न्याय्य लढ्याच्या पाठीशी उभे राहणे, हेच संघटित कामगार शक्तीचे खरे सामर्थ्य आहे.
कामगार एकजुटीचा विजय असो!
गुरुपौर्णिमेनिमित्त धर्मराज्य पक्षाचे अध्यक्ष मा. राजन राजे यांच्या आशीर्वादासाठी कार्यकर्त्यांची ठाणे कार्यालयात मांदियाळी; न्याय, पर्यावरण व कष्टकऱ्यांच्या हक्कांसाठी संघटित संघर्षाचा निर्धार!
भारतातील पहिलावहिला पर्यावरणस्नेही हरित पक्ष अशी सर्वमान्य ओळख असलेला धर्मराज्य पक्ष आणि कष्टकऱ्यांची लढाऊ संघटना धर्मराज्य कामगार-कर्मचारी महासंघ यांचे संस्थापक/अध्यक्ष मा. राजन राजे यांना गुरुपौर्णिमेनिमित्त शुभेच्छा देण्यासाठी व त्यांचे आशीर्वाद घेण्यासाठी, आज बुधवार, दि. २९ जुलै-२०२६ रोजी पक्षाच्या ठाणे येथील कार्यालयात निष्ठावान कार्यकर्ते, पदाधिकारी, कामगार सदस्य व हितचिंतकांनी मोठ्या संख्येने उपस्थिती लावली.
आपल्या गुरूप्रती असलेली निष्ठा, आदर आणि प्रेम व्यक्त करण्यासाठी दिवसभर कार्यकर्त्यांचा ओघ सुरू होता. प्रत्येकाशी आत्मीयतेने संवाद साधत, त्यांच्या व त्यांच्या कुटुंबीयांच्या सुख-दुःखाची विचारपूस करत मा. राजन राजे यांनी सर्वांना भरभरून आशीर्वाद दिले.
कार्यकर्ते, पदाधिकारी आणि कामगार सदस्यांच्या या प्रेमाने, ‘कामगारहृदयसम्राट’ अशी ओळख असणाऱ्या मा. राजन राजे यांचे हृदयदेखील भारावून गेले होते.
यावेळी मा. राजन राजे यांनी प्रस्थापित राजकीय व्यवस्था, अन्यायकारक व धनदांडग्या भांडवलदारी प्रवृत्तीविरोधात लढण्यासाठी सर्वांनी संघटित होऊन संघर्ष करण्याची गरज अधोरेखित केली. समाजातील वंचित, शोषित आणि कष्टकरी घटकांच्या न्याय्य हक्कांसाठी सातत्याने लढणे, हीच खरी समाजसेवा असल्याचे त्यांनी उपस्थितांना सांगितले.
कामगार आणि शेतकरी हे भारतीय अर्थव्यवस्थेचा कणा असून, तेच देशाच्या सामाजिक व सांस्कृतिक जीवनाचेही आधारस्तंभ आहेत, याची जाणीव करून देत त्यांनी संघटित शक्ती, सामाजिक बांधिलकी आणि राष्ट्रहिताची भावना अधिक दृढ करण्याचे आवाहन केले.
गुरुपौर्णिमेच्या या पावन दिवशी आपल्या मार्गदर्शकाविषयी कृतज्ञता व्यक्त करण्यासाठी उपस्थित राहिलेल्या सर्व कार्यकर्ते, पदाधिकारी, कामगार सदस्य व हितचिंतकांचे मा. राजन राजे यांनी मनःपूर्वक आभार मानले आणि न्याय, पर्यावरण, कामगार व शेतकरी हिताच्या लढ्यात अधिक जोमाने कार्य करण्याचा संदेश दिला.
भिवंडीतील ‘सिम्प्रेस इंडिया’मध्ये “धर्मराज्य कामगार-कर्मचारी महासंघा”चा आणखी एक उल्लेखनीय करार!
वाशेरे (भिवंडी) येथील मेसर्स सिम्प्रेस इंडिया प्रा. लि. या डिजिटल प्रिंटिंग क्षेत्रातील कंपनीत, अत्यंत प्रतिकूल आर्थिक परिस्थितीतही धर्मराज्य पक्षप्रणित धर्मराज्य कामगार-कर्मचारी महासंघातर्फे कामगारांच्या पगारवाढीचा करार यशस्वीरीत्या संपन्न झाला आहे. ज्येष्ठ कामगार नेते मा. राजन राजे यांच्या नेतृत्वाखाली झालेल्या या करारानुसार, कंपनीतील ३५ कायम कामगारांना सरासरी रु. १२,९५८ (सुमारे रु. १३,०००) थेट पगारवाढ मिळणार आहे.गेल्या दहा वर्षांपासून केवळ ऑनलाईन ऑर्डरच्या माध्यमातून व्यवसाय करत, तोट्यातून हळूहळू नफ्याकडे वाटचाल करणाऱ्या कंपनीत अशा स्वरूपाचा करार होणे ही उल्लेखनीय बाब मानली जात आहे. करारानुसार दुसऱ्या वर्षापासून पगारवाढीपैकी ६० टक्के रक्कम बेसिक वेतनात व ४० टक्के रक्कम अलाउन्समध्ये समाविष्ट करण्यात येणार आहे.
याशिवाय, कामगारांना दरवर्षी ६ अतिरिक्त सशुल्क सुट्ट्या, दरवर्षी ३ गणवेश, तसेच कामगार व त्यांच्या पालकांचा मेडिक्लेम प्रीमियम कंपनीतर्फे भरण्याची महत्त्वाची तरतूद करण्यात आली आहे. तसेच, येत्या काही महिन्यांत ५ ते ६ कंत्राटी कामगारांना कायम सेवेत सामावून घेण्याचा निर्णय घेण्यात आला असून, भविष्यात कायम होणारे व संघटनेचे सभासद बनणारे कामगारही या करारातील सर्व लाभांसाठी पात्र असतील.अत्यंत आव्हानात्मक आर्थिक परिस्थितीतही कामगारहित जपत झालेल्या या करारामुळे सिम्प्रेस इंडिया कंपनीतील कामगारांमध्ये समाधानाचे वातावरण निर्माण झाले असून, कामगारांनी मा. राजन राजे व धर्मराज्य कामगार-कर्मचारी महासंघाचे आभार व्यक्त केले आहेत.
रोहा येथील अंशुल इनोव्हेटिव्ह केमिस्ट्रीच्या संपाला १०० दिवस पूर्ण; एलजी हिंग व प्रोटेगोच्या कामगारांकडून संपकऱ्यांना प्रत्येकी ₹२५ हजारांची आर्थिक मदत!
मे. अंशुल इनोव्हेटिव्ह केमिस्ट्री प्रा. लि. येथील कामगारांच्या बेमुदत संपाला १०० दिवस पूर्ण झाल्यानिमित्त, धर्मराज्य पक्ष प्रणित धर्मराज्य कामगार-कर्मचारी महासंघाशी संलग्न एलजी हिंग, मुंबई व प्रोटेगो, नवी मुंबई येथील कामगार सदस्यांनी संपकरी कामगारांना एलजी हिंग, मुंबई व प्रोटेगो, नवी मुंबई युनिटकडून प्रत्येकी रु. २५,०००/- चा धनादेश प्रदान करून आर्थिक मदत केली. या प्रसंगी न्याय्य हक्कांसाठी सुरू असलेल्या संपाला संघटित कामगार चळवळीचा ठाम पाठिंबा व्यक्त करण्यात आला. तसेच, कामगारांच्या प्रलंबित मागण्यांबाबत व्यवस्थापनाने सकारात्मक भूमिका घेऊन लवकरात लवकर समाधानकारक तोडगा काढावा, अशी अपेक्षा व्यक्त करण्यात आली. या आर्थिक मदतीमुळे संपकरी कामगारांना संघर्ष पुढे नेण्यासाठी बळ मिळाले असून, विविध उद्योगांतील कामगारांनी दाखविलेल्या ऐक्यभावनेचे हे उल्लेखनीय उदाहरण ठरले.
पुणे येथील सुल्झर इंडिया कामगार युनियनच्या पदाधिकाऱ्यांनी घेतली राजन राजे यांची सदिच्छा भेट; कामगार हक्कांसाठी संघटनात्मक बळकटीचा संकल्प!
पुणे जिल्ह्यातील रांजणगाव एमआयडीसीजवळील कोंढापुरी येथील सुल्झर इंडिया प्रा. लि. या बहुराष्ट्रीय कंपनीत धर्मराज्य पक्ष व धर्मराज्य कामगार-कर्मचारी महासंघाचे अध्यक्ष तसेच सुल्झर इंडिया कामगार युनियनचे मार्गदर्शक मा. राजन राजे यांची युनियनच्या पदाधिकाऱ्यांनी सदिच्छा भेट घेतली.
यावेळी संघटनेचे अध्यक्ष सागर धुमाळ, सेक्रेटरी स्वप्नील शेळके, कार्याध्यक्ष किरण दरेकर, उपाध्यक्ष प्रशांत माने, खजिनदार प्रवीण शेळके, मिलिंद पिंगळे, मंगेश गायकवाड, अजय निळकंठ तसेच इतर सदस्य व कार्यकर्ते उपस्थित होते.
या भेटीदरम्यान कामगारांच्या विविध प्रश्नांवर, संघटनेच्या आगामी वाटचालीवर, कामगार हक्कांच्या संरक्षणासाठी आवश्यक उपाययोजनांवर तसेच संघटना अधिक बळकट करण्याच्या दृष्टीने सविस्तर चर्चा करण्यात आली. कामगारांच्या न्याय्य हक्कांसाठी संघटित प्रयत्न अधिक प्रभावीपणे सुरू ठेवण्याचा निर्धार यावेळी व्यक्त करण्यात आला.
धर्मराज्य पक्ष प्रणित धर्मराज्य कामगार-कर्मचारी महासंघ व सुल्झर इंडिया कामगार युनियन यांच्या माध्यमातून कामगार हितासाठीची लढाई अधिक जोमाने पुढे नेण्याचा संकल्प!
रोहा येथील अंशुल इनोव्हेटिव्ह कंपनीतील संपाला ७३ दिवस पूर्ण; धर्मराज्य कामगार-कर्मचारी महासंघाकडून संपकरी कामगारांना आर्थिक मदत
रोहा (जि. रायगड) : मे. अंशुल इनोव्हेटिव्ह केमिस्ट्री प्रा. लि. येथील कामगारांच्या न्याय्य हक्कांसाठी आदरणीय राजन राजे यांच्या मार्गदर्शनाखाली सुरू असलेल्या बेमुदत संपाला आज ७३ दिवस पूर्ण झाले. गेल्या ७३ दिवसांपासून सुरू असलेला हा संघर्ष कामगारांच्या एकजुटीने आणि निर्धाराने सुरू असून, या पार्श्वभूमीवर “धर्मराज्य पक्ष” प्रणित धर्मराज्य कामगार-कर्मचारी महासंघाच्या वतीने संपकरी कामगारांना आर्थिक व नैतिक पाठिंबा देण्यात आला.
संपकरी कामगारांना संघर्षकाळात आर्थिक आधार मिळावा या उद्देशाने महासंघाच्या वतीने प्रत्येक संपकरी कामगारास ₹१०,००० ची आर्थिक मदत धनादेशाच्या स्वरूपात प्रदान करण्यात आली. ही मदत केवळ आर्थिक स्वरूपाची नसून, संपूर्ण धर्मराज्य कामगार-कर्मचारी महासंघ आणि त्याच्याशी संलग्न विविध युनिटमधील कामगार त्यांच्या पाठीशी खंबीरपणे उभे आहेत, हा विश्वासही यानिमित्ताने व्यक्त करण्यात आला.
या प्रसंगी महासंघाचे महासचिव महेशसिंग ठाकूर, उपाध्यक्ष रमाकांत नेवरेकर, सचिव समीर चव्हाण, खजिनदार अजित सावंत, सुल्झर पंप युनिटचे सरचिटणीस विनोद मोरे, निरंजन म्हात्रे, जगन्नाथ सलगर, महेश पवार तसेच विविध युनिटमधील पदाधिकारी आणि सदस्य मोठ्या संख्येने उपस्थित होते. वॉलमेट फ्लो कंट्रोल युनिटमधील कमलेश कोल्हे, अविनाश बडे, लोटन येलवे, निलेश घरत, दिनेश पाटील यांच्यासह हिवा इंडिया नितीन भुरे, विनोद गायकवाड, दिपक जाधव, हेमंत कदम, इडिकॉनचे राजेश कदम, राकेश म्हात्रे आणि अन्य कंपन्यांतील कमिटी सदस्यांनीही उपस्थिती लावली.
कार्यक्रमादरम्यान विविध युनिटमधील पदाधिकाऱ्यांनी व कामगार प्रतिनिधींनी आपली मनोगते व्यक्त केली. सुल्झर पंप युनिटचे सरचिटणीस विनोद मोरे यांनी आपल्या भाषणात, “धर्मराज्य कामगार-कर्मचारी महासंघ केवळ कामगारांचा पगार वाढवण्यासाठीच कार्य करत नाही, तर प्रत्येक कामगाराने स्वाभिमानाने आणि सन्मानाने जगावे यासाठी संघटना सातत्याने कार्यरत आहे,” असे मत व्यक्त केले.
यावेळी महासचिव महेशसिंग ठाकूर यांनी संघटनेच्या कार्यपद्धतीविषयी माहिती देताना सांगितले की, करार झालेल्या कामगारांकडून संघटनेकडे जमा होणारे निधीचे स्रोत हे केवळ कामगारांच्या हितासाठी आणि कल्याणासाठीच वापरले जातात. संपकरी कामगारांना देण्यात आलेली आर्थिक मदत हे त्याचेच एक उदाहरण असल्याचे त्यांनी नमूद केले. तसेच अंशुल इनोव्हेटिव्हमधील संघर्ष हा केवळ एका कंपनीपुरता मर्यादित नसून संपूर्ण कामगार चळवळीशी संबंधित असल्याने महासंघाच्या सर्व युनिट्सनी संपकरी कामगारांचे मनोबल उंचावण्यासाठी पुढाकार घेण्याची गरज असल्याचेही त्यांनी सांगितले.
उपस्थित सदस्यांनी संपकरी कामगारांनी गेल्या ७३ दिवसांत दाखविलेली जिद्द, चिकाटी आणि एकजूट यांचे कौतुक केले. कामगारांच्या प्रलंबित मागण्यांबाबत व्यवस्थापन आणि कामगार प्रतिनिधी यांच्यात सकारात्मक चर्चा होऊन लवकरच समाधानकारक तोडगा निघावा, अशी अपेक्षाही यावेळी व्यक्त करण्यात आली.
कार्यक्रमाच्या शेवटी उपस्थितांसाठी भोजनाची व्यवस्था करण्यात आली होती. संपकरी कामगार, पदाधिकारी आणि कार्यकर्त्यांनी परस्परांशी संवाद साधत संघर्षाच्या पुढील वाटचालीबाबत चर्चा केली.
“मा. राजन राजे (भाई) यांचे मार्गदर्शन, त्यांचा प्रदीर्घ संघटनात्मक अनुभव, विषयांचा सखोल अभ्यास आणि कामगार चळवळीप्रती असलेली निष्ठावान बांधिलकी यांमुळे या संघर्षाला योग्य दिशा व बळ मिळत आहे. त्यांच्या नेतृत्वावर असलेल्या दृढ विश्वासाच्या बळावर कामगार आपले न्याय्य ध्येय निश्चितपणे साध्य करतील, याबाबत कोणतीही शंका नाही.”
दरम्यान, संबंधित मागण्यांवर न्याय्य तोडगा निघेपर्यंत आंदोलन सुरू ठेवण्याची भूमिका संपकरी कामगारांनी पुन्हा एकदा स्पष्ट केली. संघर्ष कितीही काळ चालला तरी अंतिम विजय कामगारांचाच होईल, असा विश्वास यावेळी उपस्थितांनी व्यक्त केला.
कंत्राटी ते कायमस्वरूपी सेवेत; ‘धर्मराज्य कामगार-कर्मचारी महासंघा’च्या संघर्षाला यश मिळाल्याने वॉलमेट कामगारांनी घेतली राजन राजे यांची सदिच्छा भेट
दि. ०८/०६/२०२६ रोजी मेसर्स. वाॅलमेट फ्लो कंट्रोल प्रा. लि., डोंबिवली/अंबरनाथ येथील कंत्राटी कामगार सभासदांनी त्यांना कायमस्वरूपी (परमनंट) सेवेत सामावून घेण्यात आल्याबद्दल ‘धर्मराज्य पक्ष’ व ‘धर्मराज्य कामगार-कर्मचारी महासंघ’चे अध्यक्ष राजन राजे यांची ठाणे येथील कार्यालयात सदिच्छा भेट घेतली.
यावेळी कामगार प्रतिनिधींनी श्री. राजन राजे यांना शाल व पुष्पगुच्छ देऊन त्यांचा सन्मान केला तसेच कंत्राटी कामगारांच्या हक्कांसाठी सातत्याने उभारलेल्या संघर्षाबद्दल व मिळालेल्या न्यायाबद्दल मनःपूर्वक आभार व्यक्त केले. प्रसंगी संघटनेचे उपाध्यक्ष रमाकांत नेवरेकर, सचिव समीर चव्हाण, निरंजन म्हात्रे तसेच वाॅलमेट युनिट कमिटीचे पदाधिकारी व सभासद उपस्थित होते.
अंशुल इनोव्हेटिव्ह केमिस्ट्री येथील बेमुदत संपस्थळी ‘धर्मराज्य पक्ष’ प्रणित ‘धर्मराज्य कामगार-कर्मचारी महासंघा’चे अध्यक्ष राजन राजे यांची भेट
मेसर्स. अंशुल इनोव्हेटिव्ह केमिस्ट्री प्रा. लि., प्लॉट नं. २१/२, एम.आय.डी.सी., गाव-धाटाव, ता. रोहा, जि. रायगड-४०२ ११६ येथील ‘धर्मराज्य कामगार-कर्मचारी महासंघा’चे सभासद असलेले कामगार आपल्या न्याय्य हक्कांसाठी व विविध प्रलंबित मागण्यांसाठी दि. १० एप्रिल २०२६ पासून महासंघाच्या नेतृत्वाखाली बेमुदत संपावर ठामपणे बसले आहेत.आज संपस्थळी ‘धर्मराज्य कामगार-कर्मचारी महासंघा’चे अध्यक्ष राजन राजे यांनी भेट देत संपकरी कामगारांशी सविस्तर चर्चा केली. यावेळी त्यांनी कामगारांच्या अडचणी, व्यवस्थापनाकडून होत असलेला अन्याय व प्रलंबित मागण्यांबाबत माहिती जाणून घेत पुढील लढ्याबाबत मार्गदर्शन केले.
यावेळी महासंघाचे उपाध्यक्ष रमाकांत नेवरेकर, महासचिव महेशसिंग ठाकूर, खजिनदार अजित सावंत तसेच संघटनेचे इतर पदाधिकारी व मोठ्या संख्येने कामगार बांधव उपस्थित होते. संपस्थळी कामगारांमध्ये मोठा उत्साह व एकजूट पाहायला मिळाली.
कामगारांवर होणारा अन्याय कोणत्याही परिस्थितीत सहन केला जाणार नाही. कामगारांच्या न्याय्य मागण्या मान्य होईपर्यंत ‘धर्मराज्य कामगार-कर्मचारी महासंघा’चा लढा अधिक ताकदीने सुरू राहील, असा ठाम निर्धार यावेळी व्यक्त करण्यात आला.
नवी मुंबईच्या ‘इडिकॉन न्यूमॅटीक’ कंपनीतील ‘धर्मराज्य कामगार-कर्मचारी महासंघा’तर्फे अत्यंत प्रतिकूल परिस्थितीत, कामगारांच्या मोठ्या पगारवाढीचा त्रैवार्षिक-करार संपन्न!
कामगार नेते मा. राजन राजे यांच्या नेतृत्त्वाखाली, सरासरी १२,५०० रुपयांची इडिकॉन-कामगारांना थेट पगारवाढ (‘CTC’सारख्या तद्दन फसव्या संकल्पनेनुसार फुगवलेली नव्हे)….
———————————-
‘ट्रंप’कृत अमेरिकी-टेरिफ युद्धाला तोंड देता देता…ज्या कंपनीचं उत्पादन, मोठ्याप्रमाणावर आजवर अमेरिकेला निर्यात होतं आलेलं आहे; त्या कंपनीच्या वार्षिक-उलाढालीत स्वाभाविक मोठी घसरण अपेक्षितच होती. *गेल्यावर्षीच्या तुलनेत जवळपास ४२ कोटींवरुन ३५ कोटींपर्यंत वार्षिक-उलाढाल घसरण्याचा प्राथमिक अंदाज असताना देखील, आजवरच्या सौहार्द्रपूर्ण औद्योगिक-संबंधांची योग्य जाण ठेवत, इडिकॉन-व्यवस्थापनाने ‘धर्मराज्य पक्ष’प्रणित ‘धर्मराज्य कामगार-कर्मचारी महासंघा’शी केलेला* हा आश्चर्यजनक करार होय!
“Profis are Private & Losses are Public” चा सध्या कामगारविरोधी ‘जमाना’, औद्योगिक व सेवा क्षेत्रात सर्वत्र हातपाय पसरुन असण्याच्या पार्श्वभुमीवर झालेला, हा उल्लेखनीय करार आहे.
…भरीस भर म्हणून देशात भाजप-संघीय ‘कामगारघातकी’ सरकारने लादलेल्या ‘४ काळ्या कामगार-संहितां’द्वारे (4 Black Labour-Codes) आणल्या गेलेल्या, ‘वैयक्तिक-करार’ करण्याच्या ‘फोडा-झोडी’च्या तरतुदींच्या प्रवाहाविरोधात पोहत जात केलेला हा करार आहे, हे विशेषच!
नवी मुंबई कामगारांच्या आर्थिक उन्नयनासाठी गेल्या तीन दशकांहून अधिक काळ, प्रस्थापित भांडवली व्यवस्थेविरोधात संघर्ष करणारे ज्येष्ठ कामगार-नेते, ‘धर्मराज्य पक्ष’प्रणित ‘धर्मराज्य कामगार-कर्मचारी महासंघा’चे संस्थापकीय अध्यक्ष मा. राजन राजे यांनी, आपल्या कार्यकर्तृत्त्वाला साजेसा असा, पुन्हा एकदा पगारवाढीचा ऐतिहासिक त्रैवार्षिक-करार संपन्न केला असून, नवी मुंबईस्थित रबाळे एमआयडीसी येथील, ‘इडिकॉन न्यूमॅटीक’ या बहुराष्ट्रीय कंपनीतील कामगार सभासदांना, तब्बल सरासरी १२ हजार ५०० रुपयांची (CTC वगळून) थेट पगारवाढ मिळाली आहे.
मंगळवार, दि. २४ मार्च-२०२६ रोजी, रबाळे येथील ‘विस्टा-ईन’ या हॉटेलमध्ये, औद्योगिकक्षेत्रात कामगारहिताची सळसळ निर्माण करणारा असा, त्रैवार्षिक-करार संपन्न झाला. या करारांतर्गत, ‘इडिकॉन’च्या कामगार सभासदांना, ९० हजार ते १ लाख ७३ हजार इतका भरभक्कम दिवाळी बोनसही दरवर्षी मिळणार आहे. परिणामी, या करारामुळे कामगारांचे वेतनमान कमीतकमी ६० हजार ५०० ते जास्तीतजास्त १ लाख ३ हजार इतके वाढले आहे.
अमेरिकेचे राष्ट्राध्यक्ष डोनाल्ड ट्रंप यांनी, भारतावर लादलेल्या अन्यायकारक टेरिफला समर्थपणे तोंड देत, इडिकाॅन व्यवस्थापन व कामगार-नेते मा. राजन राजे यांच्या नेतृत्त्वाखाली हा करार संपन्न झाल्याने, नवी मुंबईच्या औद्योगिक क्षेत्रातील कामगारविश्वात मोठ्या उत्साहाचं उत्सवी वातावरण आहे. त्याचबरोबर, ‘इडिकॉन न्यूमॅटीक’ कंपनीचे मालक (एमडी/सीईओ) श्री. ऑब्री डिकून्हा साहेब व त्यांचे पुत्र आणि कंपनीचे डायरेक्टर श्री. ॲरोन डिकून्हा साहेब, यांचे मोलाचे सहकार्य व सामंजस्याची भूमिका यामुळेदेखील हा करार यशस्वी झाला आहे. मा. राजन राजे यांच्या नेतृत्वाखालील, ‘धर्मराज्य कामगार-कर्मचारी महासंघ’ या युनियनच्या परंपरेनुसार औद्योगिक शिस्त व शिरस्ता पाळत, ‘इडिकॉन’च्या कामगार सभासदांनी, आंतरराष्ट्रीय पातळीवर प्रतिकूल परिस्थिती असतानाही, उत्पादनाचा दर्जा व मात्रा सातत्याने उंचावत नेल्यानेच…कामगारांना इतर सोयीसुविधांच्या वाढीसोबतच, ही ऐतिहासिक पगारवाढ झालेली आहे.
1) करारानंतरची थेट सरासरी पगारवाढ = रु. 11,500 प्रतिमास
2) VDA सह सरासरी पगारवाढ = रु. 12,500 प्रतिमास
3) किमान पगारवाढ = रु. 10,600 प्रतिमास
4) कमाल पगारवाढ = रु. 15,600 प्रतिमास
5) सरासरी पगार = रु. 76,000 प्रतिमास
6) किमान पगार = रु. 60,500 प्रतिमास
7) कमाल पगार = रु. 1,03,000 प्रतिमास
सरासरी बोनस = रु. 121500 प्रतिवर्षी9) किमान बोनस = रु. 90,000 प्रतिवर्षी
10) कमाल बोनस = रु. 1,73,000 प्रतिवर्षी
या ऐतिहासिक कराराप्रसंगी ‘धर्मराज्य कामगार-कर्मचारी महासंघा’चे उपाध्यक्ष श्री. रमाकांत नेवरेकर, महासचिव श्री. महेशसिंग ठाकूर, सचिव श्री. समीर चव्हाण यांच्यासह कंपनी व्यवस्थापनाच्या वतीने, आसिस्टंट मॅनेजर (एच. आर.) श्री. योगेश सूर्यराव, एच. आर. मॅनेजर श्री. नंदकुमार पवार, सिनियर मॅनेजर (प्रोडक्शन) श्री. रवींद्र वर्पे, आसिस्टंट मॅनेजर (अकाउंट व फायनान्स) श्री. सचिन गोलांबडे तसेच, कमिटीच्या वतीने युनिट अध्यक्ष श्री. दिलीप राणे, सेक्रेटरी श्री. तुषार बेर्डे, खजिनदार श्री. सचिन म्हात्रे आणि कार्यकारिणी सदस्य श्री. राजेश कदम, श्री. दीपक घोले, श्री. प्रवीण वालनुस्कर, श्री. अमित पांचाळ आदी मान्यवर मंडळींनी उपस्थित राहून करारावर स्वाक्षऱ्या केल्या. या भरघोस पगारवाढीमुळे ‘इडिकॉन न्यूमॅटीक’ कंपनीच्या कामगार सभासदांमध्ये आनंदोत्सवाचे वातावरण निर्माण झाले असून, कामगारांनी या पगारवाढीचे जल्लोषात स्वागत करत, मा. राजन राजे यांचे मन:पूर्वक आभार व्यक्त केले आहेत.
“धर्मराज्य पक्ष”प्रणित ‘धर्मराज्य कामगार-कर्मचारी महासंघा’चा औद्योगिक चमत्कार : रोह्यातील ‘डीआरटी अँथिया’ कामगारांना १४ हजारांची थेट भरघोस पगारवाढ — राजन राजे यांचे नेतृत्व ठळक!
रोह्यातील ‘डीआरटी अँथिया’ कंपनीतील कामगारांना, १४ हजार रुपयांची (CTC वगळून) थेट भरघोस पगारवाढ!
‘धर्मराज्य कामगार-कर्मचारी महासंघा’चे अध्यक्ष राजन राजे यांचा, रायगड जिल्ह्यात औद्योगिक चमत्कार…
‘धर्मराज्य पक्ष’प्रणित ‘धर्मराज्य कामगार-कर्मचारी महासंघ’ या युनियनचा रायगड जिल्ह्यात झंझावात सुरु झाला असून, रोहा तालुक्यातील धाटाव एमआयडीसी या औद्योगिकक्षेत्रात असलेल्या, ‘डीआरटी अँथिया अरोमा केमिकल्स प्रा. लि.’ या कंपनीतील सुमारे १०५ कायम कामगार सभासदांना तब्बल १४ हजार रुपयांची थेट पगारवाढ (CTC वगळून) मिळाली आहे. ‘धर्मराज्य’चे अध्यक्ष आणि महाराष्ट्राच्या औद्योगिकक्षेत्रातील ज्वलंत कामगार-नेते मा. राजन राजे यांच्या नेतृत्वाखाली; तसेच, त्यांच्या कामगारक्षेत्रातील चळवळीला साजेशी ही भरघोस पगारवाढ झाल्याने, रायगड जिल्ह्यात अभिमानास्पद असा औद्योगिक चमत्कार घडला आहे. सोमवार, दि. २ फेब्रुवारी-२०२६ रोजी, ठाणे शहरातील टिपटॉप प्लाझा येथे संपन्न झालेल्या, पगारवाढीच्या या पहिल्यावहिल्या त्रैवार्षिक कराराप्रसंगी, व्यवस्थापनाच्या वतीने एचआर प्रमुख श्री. लतेश मिरकर, प्रोडक्शन मॅनेजर श्री. आशिष दगडे, व्यवस्थापनाचे वकील ॲड. मोहित कपूर; तर, युनियनच्या वतीने उपाध्यक्ष श्री. रमाकांत नेवरेकर, महासचिव श्री. महेशसिंग ठाकूर, सचिव श्री. समीर चव्हाण, युनिट अध्यक्ष श्री. प्रदीप जंगम, उपाध्यक्ष श्री. निखिल वरणकर, सेक्रेटरी श्री. मयुर कोंडे, कार्यकारिणी सदस्य श्री. विनोद मगर आणि श्री. रामदास साखीळकर आदी मान्यवर पदाधिकारी उपस्थित होते. पगारवाढीच्या या करारात, कामगारांना ६० टक्के डीए बेसिकमध्ये आणि ४० टक्के अलाऊन्समध्ये वाढ मिळाली आहे. त्यामुळे याआधी ३० ते ३५ हजार पगार घेणारे कामगार आता, दरमहा ४५ ते ५० हजार पगार घेणार आहेत. त्याचबरोबर, नव्याने भरती होऊन कायम होणाऱ्या कामगाराला, २२ हजार रुपयांपासून पगाराची सुरुवात होणार आहे, जो आधी एंट्री लेव्हलच्या कामगाराला १३ ते १४ हजार रुपये इतकाच तुटपुंजा पगार मिळत होता, त्यातदेखील या कराराअंतर्गत समाधानकारक वाढ करण्यात आली आहे. दरम्यान, ‘डीआरटी अँथिया’ या बहुराष्ट्रीय रासायनिक कंपनीतील कामगारांना, व्यवस्थापनाने गेल्या अनेक वर्षांपासून अतिशय कमी वेतनमानावर झुलवत ठेवले होते. मात्र, मा. राजन राजे यांच्या अध्यक्षीय नेतृत्वाखालील ‘धर्मराज्य कामगार-कर्मचारी महासंघा’चे सभासदत्व स्विकारल्यानंतर, कामगारांना सन्मानजनक वेतन व त्यांचे हक्क मिळावेत यासाठी, युनियनकडून कंपनी व्यवस्थापनासोबत बोलणी सुरु करण्यात आली. परंतु, व्यवस्थापन सकारात्मक प्रतिसाद देत नसल्याचे लक्षात येताच, मा. राजन राजे यांनी, कामगार सभासदांना आपल्या न्याय्यहक्कासाठी संपावर जाण्याशिवाय पर्याय नसल्याचे आदेश दिले. त्यासंदर्भात, कंपनी व्यवस्थापनाला “संपाची सूचना” देण्यात आली होती. अखेर व्यवस्थापनाने सामंजस्याची भूमिका घेत, युनियनने पाठवलेला सेवाशर्तींचा मसुदा मंजूर करुन, पगारवाढीचा त्रैवार्षिक करार संपन्न केला. या करारामुळे कामगारांमध्ये आनंदाचे आणि उत्साहाचे वातावरण निर्माण झाले आहे. यानिमित्ताने ‘डीआरटी अँथिया’च्या कामगार सभासदांचे अभिनंदन करताना मा. राजन राजे यांनी म्हटले की, “कामगारांनी ‘कामगारधर्म’ जोपासून, आपलं आत्मभान जागं केलं तर, भांडवली व्यवस्थेला शरण येण्यावाचून गत्यंतर नाही. कामगारांना आपली ताकद कळली पाहिजे. कारण, कारखान्यात घाम गाळून उत्पादन काढणारा कामगारच, राष्ट्रीय संपत्ती निर्माण करीत असतो. आज कामगारांच्या एकजुटीचा विजय झाला आहे, तुमच्या आतले दिवे आता कुठे पेटायला सुरुवात झालीय, ते तसेच धगधगत ठेवलेत तर, बाहेरच्या सूर्याची तुम्हाला गरजच भासणार नाही!” अशा जाज्ज्वल्य शब्दांत ‘धर्मराज्य कामगार-कर्मचारी महासंघा’चे अध्यक्ष मा. राजन राजे यांनी, ‘डीआरटी अँथिया’ कामगारांना पुन्हा एकदा शुभेच्छा दिल्या आणि रोहा-धाटाव परिसरातील उर्वरित कामगार-कर्मचारीवर्गाने या करारातून फार मोठा धडा घेण्याचे संकेत दिले!